Grána 27

Unglingar: þeir eru sko alveg ótrúlegir, Jón Gnarr skrifaði aftan á Fréttablaðið um daginn að það ætti ekki að dæma þá svona hart og gera ráð fyrir hinu verst og bla bla. Já Jón Gnarr ég bíð þér bara að koma hérna og taka vaktina fyrir mig. Ég get svo svarið það að allar mýturnar virðast vera sannar, ekki það að mér hefur alltaf verið hálf illa við unglinga síðan löngu áður en ég varð einn sjálf og meðan ég var unglingur og núna líka þegar ég telst víst til fullorðinna (allavega verð ég að teljast til fullorðinna núna eftir að fjölskyldubíllinn var keyptur, við erum að tala um Subaru Forrester eins og enginn undir 50 á). En unglingar eru dónalegir, sinnulausir, ganga illa um, frekir, tilætlunarsamir, reykja, drekka, hrækja, henda flöskum út um gluggana, ganga illa um og svona gæti ég haldið áfram lengi lengi. Þetta eru bara atriði sem ég hef tekið eftir á síðustu tveimur vöktum mínum hérna, er ekki einu sinni byrjuð að taka fyrri reynslu inn í þetta eða það sem maður getur séð bara út um gluggann hérna. Ekki það að ég geri mér alveg grein fyrir því að ég er í Harleminu og eflaust eru til ágætisgrey inn á milli, það fer bara svo ansi lítið fyrir þeim. Reyndar tveir hérna sem hafa verið alveg til fyrirmyndar, en maður tekur sko vel eftir þeim í þessum hafsjó af aumingjum og lýð, og hana nú.

Annars er ég þessa dagana rosalega mikið að velta pólitík fyrir mér, já já flestir halda að það komist ekkert annað að hjá óléttum konum en börn og þess háttar en ó nei ég er bara að velta pólitíkinni fyrir mér, hún er nú meiri tíkin. Er með einhverjar hvatir þessa dagana til að "velja" mér flokk, já langar að vita hvort ég gæti verið flokksbundin, því eins og móðir mín sæl segir þá er betra að vera innandyra og geta látið til sín taka en stöðugt að nöldra utan við. Er samt ekki alveg að sjá hvaða flokk ég ætti að velja.
Sjallarnir koma ekki til greina, hafa aldrei gert það og ég efast um að þeir geri það nokkurn tíman
Framsókn er að gera mig geðveika með þessum virkjunarmálum
Vinstri grænir eru á móti aðild að ESB
Samfylkingin er ekki að heilla mig neitt sérstaklega þó ég geti kannski ekki bent á hvað mér líkar ekki
Og ég veit ekki hvað ég á að eiga sameiginlegt með vestfirðingum og kvótasvindlurum í Frjálslyndum
Þannig að eftir stendur að ég velti þessu bara fyrir mér áfram, er samt alveg að komast á það stig að fara kannski að kynna mér málið en ekki bara hugsa um það og velta því fyrir mér, allavega verður næsta kosningaákvörðun tekin að mjög svo vel athuguðu máli.

Auður birti @ 18:04

Ég á bara eftir að vinna 9 daga núna í apríl og svo má guð vita hvenær ég fer að vinna næst, í fyrsta lagi eftir 9 mánuði og kannski ekki fyrr en eftir ár eða eitthvað. Það er mjög skrýtin tilhugsun, sérstaklega ef ég næ að taka öll þrjú prófin núna í vor, verð ég ekki einu sinni í skóla næsta vetur. Þó að tilhugsunin sé mjög ljúf núna finnst mér ekki ólíklegt að ég verði orðin aðeins eirðarlaus áður en yfir lýkur.
En núna snýst flest allt um þetta ófædda barn og undirbúning komu þess, hvort sem það felst í málun á herbergi, kaupum á dóti eða andlegum undirbúningi undir fæðinguna og eftirmála hennar. Því eins og ég hlakka mikið til þessarar fæðingar og að sjá litlaskinn og svona, þá er ég frekar stressuð yfir eftirmálunum. Hvernig getur þetta svæði þarna orðið eitthvað annað en svarthol eftir svona átök? við erum að tala um heilt barn að koma út um gat sem oftast rúmar ekki mikið meira en sæmilegt bjúga, já þið eruð alveg að átta ykkur á stærðarmuninum!!!!!
Annars líður mér bara nokkuð vel, grindin aðeins farin að láta segja til sín en ég fór í nálastungu í gær, sem var ferlega vont en ég er svo miklu betri í dag að ég er að hugsa um að fara aftur í næstu viku. Svona óhefðbundnar lækningar virðast alveg svínvirka á mig og þá er bara um að gera að nýta sér það, eins og ljósan sagði þá gerir þetta í versta lagi ekki neitt og það er nú ekki svo slæmt.

Auður birti @ 17:00